Kazahhoj vivas nomadisme en montaro, gobio kaj altaj malvarmaj lokoj. Pro tio iliaj vestoj karakterizighas per trajtoj konformaj al nomadismo sur altaj kaj malvarmaj herbejoj, ke iliaj vestoj estas faritaj chefe el felo de shafo. Por faciligi rajdadon, ili faras siajn vestojn larghaj kaj fortikaj, kaj la manikoj longas ghis trans la fingroj. En vintro ili portas ledajn vestojn kaj en somero - tolajn.

Vestoj de viroj

En vintro la viroj de Kazahh-nacio portas mantelon kaj pantalonon el felo de shafo. La ekstera flanko de mantelo kaj pantalono estas farita el fortikaj kaj akvimunaj shtofoj, kiel kordurojo, kakio kaj gabardino. Iuj portas mantelon el feloj de shafido, lupo, vulpo kaj aliaj raraj bestoj, tegitan per shtofo, au el ledo de chevalido. Ilia largha pantalono estas farita el shaffelo. En somero ili portas pantalonon el kotona au lana shtofo. La randoj de la pantalontuboj estas broditaj, kio kaj ornamas kaj fortikigas. Iliaj chemizoj kaj internaj vestoj estas faritaj el blanka tola shtofo. La kolumo de chemizo estas alta kaj brodita je la rando. Ili shatas ankau chemizon el shtofo kun krada desegno. Ekster la chemizo ili portas veshton, jhaketon kaj robon. Ili shatas kordurojon, drapon kaj gabardinon de nigra au kashtana koloro. La viroj shatas porti ankau zonon el bovledo, ornamitan per orajho, arghentajho, koralajho, perloj kaj juvelshtonoj. Maldekstre de la talio ili portas ledsakon kaj desktre tranchileton. Junuloj en tiaj vestoj aspektas belaj.

Vestoj de virinoj

Vestoj de virinoj estas faritaj el diverskoloraj brokatoj kaj kotonaj shtofoj kaj iliaj fasonoj estas variaj lau agho de la portantoj. En la lastaj dekoj da jaroj la vestoj de la virinoj multe shanghighis pro la evoluo de la socio. Iliaj vestoj, pli buntaj ol tiuj de la viroj, estas faritaj el multkoloraj atlaso, kordurojo kaj kotona shtofo. Ili shatas porti molajn, helkolorajn kaj diversaspecajn robojn. Junulinoj portas robon kun broditaj manikoj kaj multfaldaj baskoj. Ekster la robo ili portas mallongan kaj mallarghan nigran veshton. La antaupecoj de la veshtoj de la junulinoj estas ornamitaj per brilantaj arghentajhoj. Infanoj portas vestojn ornamitajn per arghentajhoj, butonoj au arghentaj moneroj. Fraulinoj portas koloran chemizon kun brodita kolumo, veshton kaj longan jakon kun mallongaj manikoj kaj baskoj garnitaj per du tavoloj da punto kaj robon kun florajhoj. Sur brusto de la vesto estas arghentaj moneroj, butonoj kaj bidaroj. Novedzinoj portas specialan veston en unu jaro. Tia vesto el rugha atlaso havas kapuchon kaj estas facile distingebla. Post 1-2 jaroj ili portas kaptukon. Mezaghaj virinoj portas en varma sezono veshton kaj longan kitelon, kiu havas broditajn bruston kaj baskojn, du poshojn kaj duonmanikojn. En malvarma sezono ili portas mantelon el felo de vulpa gambo au shafido, garnitan per lutra felo. Ankau vestoj por malvarma sezono surhavas desegnojn sur la brusto kaj basko. La virinoj portas ankau zonon el purpura au rugha tolo. La nacianoj malofte achetas vestojn kaj ili mem faras, kaj la kudroarto heredighas de generacio al generacio, dank' al kio la karakterizaj trajtoj de la nacio estas konservataj.