Plejparto de kore-nacianoj de Ĉinio vivas en la Yanbian-a Kore-nacia
Aŭtonoma Subprovinco en la orienta parto de Jilin-provinco, la Changbai-a
Kore-nacia Aŭtonoma Gubernio en la sudorienta parto de Jilin-provinco
kaj en la sudorientaj partoj de Heilongjiang- kaj Liaoning-provincoj
en nordorienta Ĉinio. La nacianoj sin okupas ĉefe pri agrikulturo
kaj estas spertaj en kulturado de rizo.
Profunde influate de han-nacio, la arkitekturo de la
korea nacio estas simila al tiu de han-nacio. Sed por konformi al
la vivmaniero de la nacio, la arkitekturo de la nacio montras siajn
proprajn karakterojn.
Domoj de la korea nacio konsistas el lignaj ĉarpentaĵoj
sur ramita tera bazo alta je 30 cm. kaj borderita per ŝtono. La
muro estas farita el ligna framo, kaj ambaŭ flankoj estas tegitaj
per pajlaj aŭ vimenaj plektaĵoj. Poste ambaŭ flankoj de la muro
estas tegitaj per argilo kaj kalkitaj. La interno de la muro estas
plenigita per sablo kaj tero aŭ restas malplena. La septoj en la
domo estas faritaj el latisoj kaj ĝiaj ambaŭ flankoj estas tegitaj
per argilo. La klapoj de la pordoj kaj fenestroj estas tirmoveblaj
kaj havas saman grandecon. La pordo kaj fenestro ambaŭ povas servi
kiel trairejoj. La vertikalaj kradoj de la fenestroj estas densaj
dum la transversaj maldensaj. La pordoj kaj fenestroj estas altaj
kaj nelarĝaj. Dank’ al tia aranĝo rilate formaton, malalta domo
povas doni impreson de gracieco kaj alteco. La tegmento estas kvargropa.
Kutime la nacianoj unue kovras la ĉevronojn per plektaĵoj el pajlo
aŭ vergoj kaj ŝmiras ilin per argilo, poste surmetas tavolon da
pajlo en dikeco de 30-50 cm., komplete tegas ĝin per pajla kradaro
aŭ pajlaj matoj, por gardi la pajlan tavolon kontraŭ vento. En urbo
oni tegmentas domon per peze grizaj tegoloj. La ekstremoj de la
firsto kaj grop-eĝoj estas suprenlevitaj kaj modeste ornamitaj.
La korto de kore-nacianoj estas oblonga, kaj parto de
la domoj estas L-formaj, instalitaj per klostreto. La ĉefa ĉambro
servas por loĝado, kaj apude kuŝas bovstalo kaj tenejo. Inter ili
sidas kuirejo. La ĉambroj en diversaj grandecoj laŭ bezono estas
septitaj per tirmoveblaj pordoj. Ĉe la muro de la ĉambroj estas
ŝrankoj kun tirmoveblaj klapoj por teni vestojn kaj litaĵojn. Tuj
post la pordo estas terlito, kaj ĉe la eniro, ĉu mastro, ĉu gastoj,
devas demeti la ŝuojn por ne malpurigi la plankojn de la ĉambro.
La nacianoj ne tre akcentas la direktiĝon de la domo,
kies dispozicio estas fleksebla. Kutime la korto ne estas fermita,
sed sendependa, la interno de la domo estas centro de aktivado,
kaj ne estas helpaj ĉambroj ambaŭflanke de la domo. Domoj en urboj
havas simplan ĉirkaŭmuron. En la kamparo oni ne konstruas ĉirkaŭmuron,
sed tenas necesan interspacon disde la najbaro.
|