Vestoj
de Maunan-nacianoj varias lau sekso, agho, sezono kaj socia pozicio.
Jako de virino kun tri flavaj puntoj estas butonumata en la mezo
kaj la pantalono havas borderon. La kolumo kaj antaupeco de la jako
surhavas nigrajn puntojn larghajn kaj mallarghajn. La largha havas
la dikecon de manghbastoneto, kaj ghia farado estas facila. La mallargha
dikas kiel alumeto kaj la farado estas delikata. La pantalonoj de
virinoj surhavas tri puntojn en grandeco de tiuj sur jako. En festo
la virinoj portas turbanon kaj ornamas hartuberon per arghenta au
jada pinglo. Antau la jako pendas arghenta plateto, kaj che iliaj
pojnoj estas arghenta au jada braceleto. Ili portas delikate broditajn
shuojn kaj floran bambuan chapelon.
Jako de viro ne surhavas puntojn, sed 5 rebrilantajn latunajn butonojn.
La posho sur dekstra interna antaupeco de vira jako estas nevidebla
same kiel tiu de virina jako. En festo la viroj portas turbanon
el 8-futa rubando volvita de maldekstre dekstren, kun kvasto che
la fino. Che la talio estas 8-futa zono kaj che ambau ekstremoj
estas tolaj kvastoj el rughaj, flavaj, bluaj kaj blankaj lanfadenoj.
La viroj portas pantalonon kun larghaj pantalontuboj kaj nigrajn
tolajn shuojn kun blanka plandumo.
Virinoj shatas porti broditajn shuojn. Iuj surhavas rughan kaj
verdan puntojn kaj aliaj desegnojn de nubo kaj lotusradiko. La virinoj
portas tiajn shuojn nur kiam ili cheestas geedzighan ceremonion
au vizitas parencojn. La nacianoj portas nigrajn tolajn shuojn.
Kiam ili bezonas longan vojaghon au viziti foiron, ili portas pajlajn
sandalojn plektitajn el bambua shelo, bambua fibro kaj pajlo. Arghentaj
ornamajhoj multe beligas la virinojn kaj infanojn. Krom arghentaj
braceletoj, ili portas ankau arghentajn orelringojn, kolringon,
pinglojn, forkojn kaj kombilojn. Junaj virinoj portas orelringojn
por indiki, ke ili jam edzinighis. Infanoj portas arghentan pendajhon
kiel talismanon.
Por siaj vestoj la nacianoj shatas nigran kaj bluan kolorojn kaj
malofte flavan kaj blankan. Ili uzas blankan shtofon nur por fari
funebran veston. En blanka vesto oni ne devas viziti aliajn. Se
ili nepre bezonas iri en alies hejmon, ili devas demeti la blankan
veston kaj blankan tukon antau ol eniri.
|