Mulau-nacio shatas indigan koloron kaj la vestoj estas simplaj. La virinoj portas jhaketon kun granda antaupeco kaj pantalonon. Fraulinoj havas harplektajhon kaj post la edzinigho ili faras la hararon tubero. Maljunulinoj shatas porti indigan kaptukon kaj delikate broditan antautukon. La viroj portas jakon butonumatan en la mezo, pantalonon kaj bovloforman chapon kunkudritan el 6 triangulaj pecoj. Maljunuloj portas jakon kun bivoformaj butonoj, malmolan bovloforman chapon kun plata supro kaj pajlajn sandalojn au tolajn shuojn. Ambau seksoj portas turbanon. La nacianoj mem teksas kaj tinkturas shtofojn por vestoj. Oni indige tinkturas krudan shtofon en granda urno kaj sekigas ghin en la sunlumo. Tion oni ripetas plurfoje. Poste oni premadas kaj bastonadas la shtofon. Dank' al tia metodo la shtofo rebrilas kaj farighas tre fortika.