La
Granda Xing'an-montaro kaj la Malgranda Xing'an-montaro en nordorienta
Ĉinio estas riĉaj kaj belaj lokoj, kie vivas kuraĝaj kaj fortaj
oroĉenoj, kiuj sin okupis pri ĉasado. La senlima primitiva arbaro,
belaj herbejoj, riveroj kaj ravinoj nutris la diligentajn oroĉenojn.
La nacio nombras 7500 membrojn, kiuj vivas en Oroĉena
Aŭtonoma Gubernio de Hulun Buir de la Aŭtonoma Regiono de Interna
Mongolio kaj Heihe de Heilongjiang-provinco en nordorienta Ĉinio.
Ili havas sian nacian parolan lingvon sed ne la skriban, kaj ili
uzas la han-nacian skriban lingvon. Oroĉen havas du signifojn: unu
estas "homo uzanta boacon", kaj la alia — "homo vivanta
sur monto".
Antaŭe oroĉenoj loĝis en konusa domo farita el 20-30
lignaj stangoj en longo de 5-6 metroj kaj feloj de bestoj aŭ betulaj
ŝeloj. Konstruado de tia domo estas simpla: unue oni starigis konusan
skeleton el kelkaj lignaj stangoj kun forkoj ĉe ekstremo por interkruciĝo.
Poste oni egaldistance vicigis stangojn inter la ĉefaj. Fine, oni
tegis la konusan skeleton per feloj de kapreolo aŭ betulaj ŝeloj
por protekti domon kontraŭ pluvo en somero kaj frosto en vintro.
Ĉe la pinto de la konuso estis truo por enlasi lumon kaj ellasi
fumon de fajro. Ĉe la sudo aŭ surdoriento de la domo estis pordo.
La kovraĵoj sur la domo ŝanĝiĝis laŭ sezono. En vintro
oni kovris ĝin per feloj de kapreolo; kaj en printempo — betulaj
ŝeloj. Oni devis prilabori la betulajn ŝelojn antaŭ ol uzi ilin:
forigi la malmolan tavolon, boligi la molan parton en kaldrono por
moligi kaj fortikigi ilin, poste oni ligis malgrandajn ŝelpecojn
en grandan pecon per ĉevalaj haroj aŭ fadeno el cerva tendeno. Fine,
oni devis kovri la skeleton per kelkaj tavoloj da grandaj ŝelpecoj
unu sur alia kaj fiksi ilin per feraj najloj al lignaj stangoj.
En vintro la domo estis konstruita sur suna deklivo, kaj en somero,
la domo estis konstruita sur alta deklivo facile aerumebla.
La meblado estis simpla. En domo estis nur kuŝejo aŭ
lito. Oni faris kuŝejon el lignoj, fojnoj, betulaj ŝeloj kaj feloj
de kapreolo. Kutime, oni dormis en tri flankoj de la domo kaj vakigis
la lastan por trairado. En la centro de la domo estis fajrujo, kaj
super ĝi pendis malgranda fera poto por kuiro. La domo de oroĉenoj
estis facile starigebla kaj malmuntebla, konforma al ilia nomada
vivo.
De
la kvina jardeko de la pasinta jarcento, la ĉina registaro disponigis
specialan monon kaj konstruis domojn por transloĝigi oroĉenojn el
arbaro. Ĝis 1958, la plejparto de oroĉenoj realigis fiskloĝadon.
En la unuaj okdekaj jaroj de la pasinta jarcento, la
registaro konstruis pli bonajn domojn el briko kaj ligno por fiksloĝigi
oroĉenojn. Lastatempe, ĝi konstruis novan ĉasistan vilaĝon por oroĉenoj,
kiuj loĝis en nebonaj domoj en regiono kun nebona natura medio.
La nova domo havas tri ĉambrojn: la centra estas sidoĉambro kaj
kuirejo, kaj la aliaj du ambaŭflanke estas dormoĉambroj. En la ĉambro
estas hejtebla terlito aŭ ligna lito. La ĉambroj estas larĝaj kaj
helaj.
Antaŭ kaj malantaŭ la domo estas granda legomĝardeno
por kulturado de legomoj kaj fungoj. Nun ĉiuj familioj bredas bovon,
porkon kaj kortobirdojn.
|